Мулоқоти Абдураҳмон Қодирӣ бо Валерий Бондаренко

Душанбе, 20.10.2014. (АМИТ «Ховар», Лайло Тоирӣ)-Тибқи фармони вазири корҳои хориҷаи Русия ба вазифаи консули генералии Федератсияи Русия дар шаҳри Хуҷанд Валерий Бондаренко таъйин гардид. Ӯ дар ин симмат ҳамкасби хеш Александр Копнинро иваз намуд. 
Раиси вилояти Суғд Абдураҳмон Қодирӣ ҳафтаи гузашта консули генералии  навтаъйин ва собиқро ба ҳузур пазируфт.
Раиси вилоят Валерий Бондаренкоро бо ин вазифа табрик намуда, изҳор дошт, ки ҳамкориҳои мутақобилаи дуҷониба минбаъд низ густариш дода мешаванд. Зикр гардид, ки Тоҷикистон бо Русия равобити дӯстонаву самарабахш дорад ва байни ин ду давлат як зумра созишномаҳои ҳамкорӣ ба имзо расидааст.
Валерий Бондаренко гуфт, ки рушду ривоҷи самтҳои мухталифи хоҷагии халқи минтақаро дар ҳоли устувор ва пешрафта мебинад ва дар фаъолияти минбаъдааш баҳри мустаҳкам намудани ҳамкориҳои дуҷониба ҷаҳду талош хоҳад варзид. 
Роҳбари вилоят оид ба нишондиҳандаҳои иқтисодиву иҷтимоии вилоят маълумот дода, зикр дошт, ки дар натиҷаи таҷдиди хоҷагиҳои калонҳаҷми кишоварзӣ дар вилоят зиёда аз 33 ҳазор хоҷагии хурди инфиродиву оилавӣ таъсис ёфтааст. Ҳамзамон мақомоти иҷроияи ҳокимияти давлатии вилоят тасмим гирифтааст майдонҳои бекорхобидаи дашти Сомғорро ба гардиши кишоварзӣ дароварда, дар ин мавзеъ шаҳраки нав ва боғи интенсивӣ бунёд намояд. Бад-ин васила дар вилоят раванди муҳоҷирати меҳнатӣ коҳиш ёфта, аз оғози сол то ба имрӯз 40 ҳазор нафар муҳоҷир дар дохили кишвар бо кори доимӣ таъмин гардид.
Дар фарҷоми мулоқот раиси вилоят ба Валерий Бондаренко барои фаъолияти минбаъдааш ба ҳайси консули генералӣ барору комёбиҳо таманно намуд.
Дар ин бора ба АМИТ “Ховар” аз Хадамоти матбуоти раиси вилояти Суғд иттилоъ доданд.