Мулоқоти раиси шаҳри Хуҷанд бо консули генералии Русия

Душанбе, 24.10.2014.(АМИТ «Ховар», Мавҷуда Анварӣ).-Раиси шаҳри Хуҷанд Раҷаббой Аҳмадзода бо консули генералии Федератсияи Русия дар шаҳри Хуҷанд Валерий Бондаренко дирӯз мулоқот намуд. 
Тибқи иттилои мақомоти иҷроияи ҳокимияти давлатии шаҳри Хуҷанд, зимни мулоқот Раҷаббой Аҳмадзода оид ба нишондиҳандаҳои иқтисодиву иҷтимоии шаҳр маълумот дода, захираю имкониятҳои мавҷудаи шаҳри Хуҷандро дар самти саноати сабук, коркарди мева, табодули таҷрибаи соҳибкорон, зикр дошт. 
Таъсиси корхонаи муштараки коркарди мева дар заминаи коргоҳи консервабарории шаҳри Хуҷанд чун яке аз имкониятҳои фаврӣ ва афзалиятноки таҳкимбахшандаи ҳамкорӣ мавриди баррасӣ қарор гирифт. Ҷонибҳо дар мавриди андешидани чораҳои зарурӣ дар ин самт ба мувофиқа расиданд.
«Баъди омӯзиши вазъи тараққиёт ва имкониятҳои шаҳри Хуҷанд ман эътимоди қавӣ пайдо кардам, ки равобити Хуҷанд бо корхонаю муассисаҳои Федератсияи Русия намунаи ҳамкорӣ барои дигарон хоҳад буд» -таъкид намуд консули генералӣ.