Нақши рушди соҳибкории хурду миёна дар соҳаи туризм

Душанбе, 30.10.2014 (АМИТ «Ховар, Фарзонаи Давлат»).-Дар доираи баргузории нахустин Анҷумани сармоягузории Созмони ҳамкории Исломӣ оид ба Осиёи Марказӣ, ки рўзҳои 27-28 октябри соли ҷорӣ дар шаҳри Душанбе доир гардид, масъалаи нақши рушди соҳибкории хурду миёна дар соҳаи туризм низ мавриди баррасӣ қарор дода шуд. 
Ба иттилои Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, дар форуми мазкур  раиси кумитаи мазкур Аҳтам Абдуллозода оид ба имкониятҳои бойи  туристии кишвар ҳамчун ҷавҳари кашфношуда ва ҷалби сармояи дохиливу хориҷӣ ба таҷдиди инфрасохтори он сухан гуфт. 
Зимни баргузории чорабинӣ филми имкониятҳои туристии кишвар манзури тамошобинон гардонида шуд. Дар даромадгоҳи Кохи Сомон гўшаи туристии Тоҷикистон таҳти унвони «Тоҷикистон кишвари туризм» ба тамошои иштирокчиёни Анҷуман гузошта шуд. 
Гуфта мешавад, ки дар нўҳмоҳаи соли ҷорӣ ба кишвар беш аз 166 ҳазор нафар сайёҳ ворид гардид, ки аз ин ба иқтисодиёти кишвар беш  аз 83 миллиону 500 ҳазор доллари амрикоӣ ворид шудааст.