Панҷакент: 5 намуди андоз иҷро нашуд

Панҷакент, 23.10.2014. (АМИТ «Ховар», Гулбаҳори Худойбердӣ).- Дар мақомоти маҳаллии ҳокимияти давлатии шаҳри Панҷакент  фаъолияти нӯҳмоҳаи соҳаи иқтисодӣ-иҷтимоии шаҳр натиҷагирӣ шуд. Муовини аввали шаҳр Ислом Шафиев гуфт, ки дар нӯҳ моҳи соли 2014 ба қисми даромади буҷет ба ҷои 99 миллиону 313 ҳазор сомонӣ аз рӯи ҳамаи намуди сарчашмаҳои маблағгузорӣ 96 миллиону 32 ҳазору 427 сомонӣ маблағ ворид гардид, ки баробари 96,7 фоизи нақша мебошад. Феълан 5 намуди андозу пардохт иҷро нагардидааст.   
То ин муддат оид ба гирифтани қитъаҳои замини наздиҳавлигӣ 18 347 адад аризаи шаҳрвандон ба қайд гирифта шуда, ҳамагӣ ба 15 062 нафар шаҳрванди эҳтиёҷманд замини наздиҳавлигӣ дода шуд. Аз ин шумора 12484 нафар эҳтиёҷманд бо қитъаҳои замини наздиҳавлигӣ таъмин гардид. Тақсимоти замини наздиҳавлигӣ ба эҳтиёҷмандон идома дорад.
Дар айни замон дар ду иншооти бузург -сехи холисгардонии тилло дар Ҷамъияти дорои масъулияти маҳдуди корхонаи муштараки «Зарафшон» ва фабрикаи истеҳсоли мису қалъагӣ дар деҳаи Рукнободи ҷамоати деҳоти Ворӯ корҳои сохтмонӣ идома доранд.