Пешгирии ҷинояткорӣ байни ноболиғон

  Душанбе, 31.10.2014. (АМИТ «Ховар», Муқаддас Темурзода).- Бо мақсади пешгирии амалҳои номатлуб дар байни наврасону ҷавонон, ҷиноятҳое, ки аз тарафи ноболиғон содир мешаванд аз қабили дуздӣ, авбошӣ, задухӯрдҳои гурӯҳӣ ва инчунин пешгирӣ аз бемориҳои сироятӣ, ВНМО/БПНМ ва нашъамандӣ, оворагардӣ ва дигар амалҳои номатлуб ҳафтаи равон кормандони Агентии назорати маводи нашъаовари назди Ҳукумати ҶТ дар мактабҳои таҳсилоти умумии №67 ва №73-и ноҳияи Сино бо хонандагони синфҳои болоӣ ва падару модарони онҳо вохӯрӣ гузарониданд.
     Дар вохӯрӣ кормандони Хадамоти муҳоҷират, ҳифзи ҳуқуқи кӯдак, Шӯъбаи корҳои дохилии н. Сино, кормандони беморхонаи марказии касалиҳои пӯст, Ассотсиатсияи ташкилоти ҷомеаи шаҳрвандии ҷавонони раванди рушд, бахши ҷавонон варзиш ва сайёҳии ноҳияи  Сино ширкат варзиданд.
      Дар чорабинӣ аз тарафи мутахассисон барои пешгирии амалҳои номбурда ба волидони хонандагон маслиҳатҳо дода, хонандагонро ба арҷгузорӣ аз ободии Ватан, меҳнатдӯстӣ, донишандӯзӣ ва тарғиби тарзи ҳаёти солим ташвиқ намуданд.