Пешниҳоди Тоҷикистон ҷиҳати ҳимояи ҳуқуқи муҳоҷирони меҳнатӣ

   Душанбе, 23.10.2014.(АМИТ «Ховар», Марзия Саидзода).- Масоили  ҳимояи ҳуқуқ ва фароҳам овардани шароити мусоид барои муҳоҷирони меҳнатии тоҷик дар қаламрави Русия зимни мулоқоти раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев бо муовини аввали раиси Ҳукумати Русия Игор Шувалов дар Маскав матраҳ гардиданд.
Дар мулоқот, ки бо иштироки васеи ҳайати Тоҷикистон сурат гирифт, ҳамзамон масъалаҳои содда кардани низоми имтиҳонсупории муҳоҷирони меҳнатӣ ва дар ҳудуди Тоҷикистон кушодани бахши сохторҳои Хадамоти Федералии муҳоҷирати Федератсияи Русия барои қабули имтиҳон, дар лоиҳаи нави қонуни дахлдори Русия оид ба муҳоҷирони меҳнатӣ пешбинӣ намудани масъулияти корфармоён нисбат ба муҳоҷирони меҳнатӣ баррасӣ гардиданд.
              Ҳамзамон мусоҳибон масъалаҳои вобаста ба ташкили марказҳои муосири логистикӣ ва ҷойҳои нави корӣ, густариши робитаҳои тиҷоративу иқтисодии  байниминтақавиро муҳокима карданд.
 Дар фарҷом пешниҳодҳои ҷониби Тоҷикистон барои баррасии Ҳукумати Федератсияи Русия қабул  шуданд, ки то ҷаласаи навбатии комиссияи байниҳукуматии Тоҷикистону Русия  ба таври касбӣ омӯхта шаванд. Бо ин мақсад гурӯҳҳои корӣ созмон дода шуданд.