Президент: «Пойтахт маркази маъмурии давлат аст»

Душанбе, 20.10.2014.(АМИТ «Ховар», Марзия Саидзода).-«Фаромӯш набояд кард, ки пойтахт, пеш аз ҳама, маркази маъмурии давлат аст. Бинобар ин, иншооту биноҳои бунёдшаванда бояд ба талаботу меъёрҳои муосир ҷавобгӯ буда, таҷассумкунандаи унсурҳои меъмории миллӣ бошанд». Ин матлабро Президенти Ҷумҳурии Тоҷикистон Эмомалӣ Раҳмон зимни суханронӣ дар маҷлиси тантанавӣ бахшида ба 90-солагии Душанбе, ки 18 октябр дар бинои Театри опера ва балети ба номи С. Айнӣ баргузор шуд, иброз дошт. Дар ин росто  Сарвари давлат зикр кард, ки ин масъалаи муҳим бояд таҳти назорати доимии Агентии сохтмон ва меъморӣ ва  шаҳрдории Душанбе қарор дошта бошад, зеро аз мушоҳидаҳо бармеояд, ки дар дурнамои наздик барои рушди пойтахт баъзе мушкилот ба вуҷуд меоянд, ки бояд аз ҳоло ҷиҳати ҳалли онҳо андеша кунем ва дар ин самт тадбирҳои заруриро роҳандозӣ намоем.      
          Ҳамзамон Президенти кишвар таъкид кард, ки ҳалли бисёр масъалаҳои вобаста ба рушди пойтахт аз эҳсоси масъулиятшиносӣ, қобилияти ташкилотчигиву роҳбарӣ, фарҳанги шаҳрнишинӣ, сатҳи донишу кордонӣ ва муносибати дилсӯзонаи ҳар як сокини пойтахт ва албатта, роҳбарону масъулони сохторҳои мухталифи шаҳрдорӣ вобастагӣ дорад.
               Дар ин росто, бо назардошти афзоиши аҳолӣ бунёди мактабу кӯдакистонҳои нав ва дар онҳо фароҳам овардани шароити замонавӣ, ташкили коргоҳу корхонаҳои истеҳсолӣ ва муҳайё намудани ҷойҳои кории иловагӣ барои сокинони пойтахтро Президенти мамлакат аз ҷумлаи вазифаҳои муҳимтарин дар назди шаҳрдорӣ арзёбӣ намуд.