Самтҳои ояндадори ҳамгироии Тоҷикистон

Душанбе, 20.10.2014. (АМИТ «Ховар», Кристина  Эрлих). — Бо  ибтикори  намояндагии  Бунёди   рушди «Пажӯҳишгоҳи таҳқиқи АвруОсиё»  дар  Тоҷикистон  ва  мусоидати Сафорати  Федератсияи  Русия  дар  Тоҷикистон  23  октябр  дар  шаҳри  Душанбе  мизи  мудаввар  дар  мавзӯи  «Тоҷикистон  чун  воҳиди  ҳамгироии  муосир : вазъу  дурнамо» баргузор  мегардад. 
Тавре  ки  ташкилкунандагони  чорабинӣ  ба  АМИТ «Ховар»  хабар  доданд, мақсади  асосии  доир  намудани  мизи  мудаввар  муҳокимаи  самтҳои  ояндадори  Тоҷикистон дар системаи  хоҷагидории  ҷаҳон  ва ҷиҳатҳои  сиёсӣ,  иқтисодӣ ва ҳуқуқию  гуманитарӣ  мебошад. 
Дар  ҷараёни  мизи  мудаввар  масоили  мубрами ҳамгироии илм, маориф, истеҳсолот ва таҷдиди  иқтисодиёти Ҷумҳурии  Тоҷикистон,  аз ҷумла  натоиҷи тадқиқот  аз  рӯи   самтҳои  афзалиятнок  мавриди  муҳокима  қарор  мегиранд.
Иштироки  сиёсатмадорон,  дипломатҳо, коршиносон, намояндагони  аҳли  тиҷорат,  олимон  ва  ходимони  ҷамъиятӣ  дар  ин  чорабинӣ   дар назар  аст.