Сарқонун — бахтномаи миллат

Душанбе, 25.10.2014. (АМИТ «Ховар», Зарангези Латиф).- Дар остонаи таҷллили 20-солагии қабули Конститутсия (Сарқонуни) Ҷумҳурии Тоҷикистон имрӯзҳо дар саросари кишвар оид ба нақши Сарқонун дар ҷомеаи кунунӣ силсилаи мулоқоту суҳбатҳо бо аҳолии касбу кори гуногун баргузор гардида истодааст.
Ба иттилои дафтари матбуоти раиси вилояти Суғд, чунин як мулоқоти судманд дар мавзӯи “Сарқонун — бахтномаи миллат” дар филиали Коллеҷи тарбияи ҷисмонӣ дар шаҳри Чкалов доир шуд.
Дар он Дилбар Самадова, мудири кафедраи журналистика ва назарияи тарҷумаи ДДХ ба номи академик Б. Ғафуров, Муҳаббат Почоева-дотсенти кафедраи фанҳои ҷамъиятии ДҲБСТ, Аҳрорхон Хоҷаев-намояндаи Раёсати ҷавонон, варзиш ва сайёҳии вилояти Суғд ва Боқӣ Қудратов- намояндаи мақомоти иҷроияи ҳокимияти давлатии шаҳри Чкалов иштирок ва суханронӣ намуданд.
Зимни баромад иштирокдорон изҳор намуданд, ки Конститутсияи Ҷумҳурии Тоҷикистон қонуни асосӣ буда, асосҳои сохтори конститутсионӣ, ҳуқуқ, озодӣ ва вазифаҳои асосии инсон ва шаҳрванд, ташкили ҳокимияти давлатиро муайян мекунад.