Сатҳи таваррум муътадил аст

 Душанбе, 24.10.2014. (АМИТ «Ховар», Лайло Тоирӣ).-    Мувофиқи иттилои Агентии омори ҷумҳурӣ дар моҳи сентябри соли равон сатҳи таваррум муътадил ва устувор буд. Нишондиҳандаи мазкур дар ин моҳ 0,2 фоизро ташкил намуд, ки нисбат ба ҳамин давраи соли гузашта 0,1 фоиз паст аст. Дар давраи январ-сентябри соли ҷорӣ, сатҳи таваррум, 5,7 фоизро ташкил дода, дар давоми 12 моҳ ин нишондиҳанда ба 6,6 фоиз баробар шуд. 
     Тавре аз Бонки миллии Тоҷикистон хабар доданд, яке аз фишангҳои дигари сиёсати пулию қарзӣ — меъёри бозтамвил,  3 октябри соли равон бо мақсади таъмини самаранокии сиёсати пулию қарзӣ бинобар зиёд гардидани таъсири фишорҳои таваррумӣ ба иқтисодиёт дар сатҳи 6,9 фоизи солона муқаррар карда шуд.