Сохтмони биноҳои истиқоматӣ давом дорад

Душанбе, 22.10.2014. (АМИТ «Ховар», Кристина  Эрлих). — Тайи  9  моҳи  соли  ҷорӣ дар  кишвар 603,2  ҳазор  метри  мураббаъ биноҳои истиқоматӣ мавриди  истифода  қарор гирифтанд, ки  нисбат  ба  ҳамин  давраи  соли  гузашта  120,7  фоизро  ташкил  медиҳад. Дар  ин  бора  аз Агентии  омори   назди  Президенти  ҶТ   ба  АМИТ «Ховар» хабар  доданд.
Аз ҷумлаи  умумии  биноҳои истиқоматии ба  истифода додашуда   қисми  зиёдашон  ба  вилояти  Суғд  рост  меояд. Дар  ин  ҷо  231,7  ҳазор  метри мураббаъ  биноҳои  истиқоматӣ  мавриди  истифода қарор  гирифтааст. 
«Сохтмони  биноҳои  истиқоматӣ  дар  ҷумҳурӣ  асосан  аз  ҷониби  ниҳодҳои  бахши ғайридавлатӣ  сурат  мегирад. Масалан, тайи  давраи  ҳисобот  ниҳодҳои  мазкур 543  ҳазор  метри  мураббаъ  биноҳои  истиқоматӣ  бунёд  намуданд, ки  ин  90  фоизи  ҳаҷми  умумии  онҳоро ташкил  медиҳад», — зикр  намуданд  дар Агентии  омори  кишвар.
Ғайр  аз  ин,  дар  давраи  ҳисобот  45 мактаби  таҳсилоти  умумӣ барои  7 430  хонанда  ва  ду  муассисаи  таҳсилоти  томактабӣ  барои  1150  кӯдак  ба  истифода дода шуд.