Спитамен: «Сарқонун-роҳнамои халқ»

Душанбе, 23.10.2014.(АМИТ «Ховар», Мавҷуда Анварӣ).-Дар ноҳияи Спитамен бахшида ба 20-солагии Сарқонуни Ҷумҳурии  Тоҷикистон чорабинии сиёсӣ таҳти унвони «Сарқонун-роҳнамои халқ» баргузор гардид.
Тибқи иттилои Хадамоти матбуоти раиси вилояти Суғд, дар ин ҳамоиш масъулони   мақомоти иҷроияи ҳокимияти давлатии ноҳия   ва роҳбарони ташкилоту идораҳо, намояндагони муассисаҳои фарҳангӣ, маориф ва тиб, кумитаи маҳаллаҳо ва фаъолон иштирок карданд. 
Иштирокдорон оид ба тарбияи насли наврас дар рӯҳияи худогоҳию хештаншиносӣ, пос доштани арзишҳои миллӣ ва таърихии Ватан, ифтихори ватандорӣ сухан ронда, таъкид намуданд, ки Сарқонун ба сифати қонуни олии давлат масъалаҳои муҳимтарини сиёсӣ, иқтисодӣ, иҷтимоӣ ва ахлоқии ҷомеа, ҳуқуқ, озодӣ ва вазифаҳои асосии инсон ва шаҳрванд, тартиби таъсис, доираи салоҳият ва фаъолияти мақомоти давлатиро муайян менамояд.  Маҳз давлати ҳуқуқбунёд зербинои асосии мавҷудияти ҳама гуна озодӣ мебошад.