Ташкили шароит барои сайёҳон дар Тоҷикистон

Душанбе, 31.10.2014 (АМИТ “Ховар”, Фарзонаи Давлат).- Субҳи имрўз раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода бо гурўҳи коршиносони Коорпаратсияи байналмилалии молиявии Бонки ҷаҳонӣ дар бахши туризм баҳри таҳлили фаъолияти соҳибкории меҳмонхонаҳо ва рушди ҳамкории минбаъда дар ин соҳа мулоқот намуд. 
Бино ба иттилои Кумитаи мазкур дар мулоқот Аҳтам Абдуллозода ба коршиносони Бонки ҷаҳонӣ Камал Баракат ва Эсин Йилирим имкониятҳои туристии Тоҷикистонро вобаста ба таъсиси бизнеси меҳмонхонавӣ ва қабули бештари сайёҳони саргузаштӣ дар ҷойҳои дурдасти кишвар ва Шоҳроҳи бузурги Абрешим бо таъсиси ҷойҳои нави корӣ баҳри беҳтар намудани сифати хизматрасонӣ ба сайёҳон, сармояи баргардонидашуда арзёбӣ намуда, бонки мазкурро барои дастгирии ин лоиҳа дар Тоҷикистон даъват намуд. 
Гуфта мешавад, ки коршиносони байналмилалӣ имкониятҳои туристии Тоҷикистонро ояндадор арзёбӣ намуда, эътимод ба ҳамкории минбаъда ва таҳлили амиқи натиҷаҳои сафарро умедворкунанда арзёбӣ намуданд. 
Ёдрас мешавем, ки дар ояндаи наздик чунин меҳмонхонаҳо дар Шоҳроҳи бузурги Абрешим сохта мешаванд, ки он заминаи асосии ҷалби сайёҳон ва ба ҳам овардани фарҳанги миллатҳо мегардад.