Туҳфаи Барномаи рушди СММ ба мактаб-интернати нобиноён

Ҳисор, 23.10.2014. (АМИТ «Ховар», Ҳотами Шариф).- Дирӯз шодию хурсандии кӯдакони нобино ва сустбини мактаб-интернати ҷумҳуриявии ноҳияи Ҳисор интиҳо надошт, зеро бо ташаббуси Ташкилоти ҷамъиятии нобиноёни Тоҷикистон ва бо маблағгузории Барномаи рушди СММ дар Тоҷикистон ба талабагони мактаб-интернат китобҳои дарсӣ туҳфа гардиданд.
Ба ин муносибат дар ин ҷо чорабинии хотирмон барпо шуд. Директори давлатии Барномаи рушди СММ дар Тоҷикистон Наримаса Шима Мура, директори Маркази миллии Ҷумҳурии Тоҷикистон оид ба безараргардонии минаҳо Муҳаббат Иброҳимзода, раиси Ташкилоти ҷамъиятии нобиноёни Тоҷикистон Т. Давлатов, директори мактаб-интернати мазкур Сурайё Солиева ва дигарон сухан гуфтанд.
Теъдоди китобҳои туҳфашуда 261 адад буда, он чор намуди китобҳои дарсиро ташкил медиҳад.
Мавриди зикр аст, ки дар мактаб-интернати номбурда 168 нафар кӯдак аз тамоми манотиқи ҷумҳурӣ бо тамоми шароитҳои таҳсил ва фароғат фаро гирифта шудааст.