Заминаҳо барои нашри дуюми «Китоби сурхи Тоҷикистон»

Душанбе, 23.10.2014. (АМИТ, «Ховар», Назири Назир).- 22-юми октябри соли ҷорӣ дар Кумитаи ҳифзи муҳити зисти назди Ҳукумати Ҷумҳурии Тоҷикистон ҷаласаи Комиссия оид ба ҳайвоноту набототи нодире, ки зери хавфи маҳвшавӣ қарор доранд, доир гардид.
Дар ҷаласа  мутахассисони Кумитаи ҳифзи муҳити зист,  коршиносону олимони Академияи улуми Ҷумҳурии Тоҷикистон, институтҳои ботаника, физиологияву генетика ва зоологияву паразитологияи АИҶТ иштирок доштанд. 
Дар нишаст доир ба масоили  «Заминаҳои асосӣ барои таҳия ва нашри дуюми «Китоби сурхи Тоҷикистон», ҳамчунин баррасии рӯйхати намудҳои нодири олами набототу ҳайвоноте, ки зери хавфи маҳвшавӣ қарор доранд ва бори аввал ба «Китоби сурхи Тоҷикистон» ворид мешаванд,  табодули афкор сурат гирифт. 
Дар интиҳо комиссияи мазкур доир ба масъалаи баррасишаванда қарори дахлдор қабул намуд.