Мусодираи аслиҳаи оташфишон
Душанбе, 3 ноябр. (АМИТ «Ховар», Муқаддас Темурзода ).- Кормандони милиса ҳодисаҳои хилофи қонун нигоҳ доштани аслиҳаи оташфишонро ошкор намуданд. Мувофиқи маълумоти ВКД ҶТ, дар ҳудуди ноҳияи Рӯдакӣ аз сокини 35 — солаи шаҳри Душанбе Ҳазратқул Файзиев таппончаи «Макаров» бо тирдонаш мусодира гардид.
Сокини шаҳри Душанбе Амонулло Шарифов, ки дар шаҳри Хуҷанд муваққатан сукунат дорад, аз халтаи биринҷ як таппончаи тамғаи «Макаров» ва панҷ тирро пайдо намуда, онҳоро ба кормандони милиса супурд.
Дар ҷараёни амалиёти дигари махсус шаҳрванд Исмоилҷон Саидов бо гумонбари хилофи қонун пинҳон доштани аслиҳа дастгир шуд. Маълум гардид, ки мавсуф аслиҳаи оташфишонро соли 2008 дар шаҳри Норак аз Ҷумъа ном марде харидааст.
Аз рӯи ҳодисаҳои зикршуда парвандаҳои ҷиноӣ кушода, тафтишот идома дорад.