«Мактаби занҳои роҳбар» барои донишҷӯдухтарон

Душанбе, 3.12.2014. (АМИТ «Ховар», Лайло Тоирӣ). — Дар шуъбаи кор бо занон ва оилаи мақомоти иҷроияи ҳокимияти давлатии вилояти Суғд бо донишҷӯдухтарони хобгоҳи №3-и Донишгоҳи давлатии Хуҷанд ба номи академик Бобоҷон Ғафуров ва бо донишҷӯдухтарони Донишкадаи иқтисод ва савдои Донишгоҳи тиҷоратии Тоҷикистон семинари омӯзишӣ дара шуданд мавзӯи “Мактаби занҳои роҳбар” гузаронид.
Тавре ки аз Кумитаи кор бо занон ва оилаи назди Ҳукумати ҷумҳурӣ иттилоъ доданд, семинари мазкур баҳри иҷрои нақшаи чорабиниҳои барномаи давлатии “Тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони лаёқатманд барои солҳои 2007-2016” ва бо мақсади баланд бардоштани малакаи роҳбарии занону духтарон гузаронида шуда, дар он зиёда аз 60 нафар донишҷӯдухтар аз курсҳои болоӣ ширкат варзид.
Дар семинари омӯзишӣ ба донишҷӯдухтарон оид ба роҳбарии занон дар самтҳои мухталиф, масъулиятшиносии онҳо, намунаи ҳамагон будан, навовар ва ҳамқадами замон будан, касби худро дӯст доштан ва дар ҷамъият мавқеъ доштан омӯзонида шуд. Дар навбати худ ҷонишҷӯдухтарон низ фикру ақидаи худро оид ба мавқеи зан-роҳбар иброз намуда, дар семинар фаъолона иштирок намуданд.
Баргузории чунин семинари омӯзишӣ оид ба мавзӯи “Мактаби занҳои роҳбар” дар Донишгоҳи давлатии ҳуқуқ, бизнес ва сиёсати Тоҷикистон ва Донишкадаи политехникии Тоҷикистон ба номи академик Муҳаммад Осимӣ  идома дорад.