Ҳафтаи синамои тоҷик дар Озарбойҷон

Душанбе, 05.03.2015 (АМИТ «Ховар»).- Рўзҳои 10 то 14 марти соли 2015, бо ибтикори Сафорати ҶумҳурииТоҷикистон дар Ҷумҳурии Озарбойҷон дар доираи чорабиниҳои фарҳангӣ «Ҳафтаи синамои тоҷик» баргузор хоҳад шуд. 
Ин чорабинии муҳим гувоҳи ҳамкориҳои судманди соҳаи фарҳанги ҳар ду кишвари дўст буда, таҳким бахшидан ва вусъат додани ҳамбастагиҳои мусоиди соҳавӣ, инчунин шиносонидани дастовардҳои синамогарони тоҷикро ҳангоми офаридани филмҳои бадеӣ, ҳуҷҷатӣ, бачагона  дар даврони мухталиф бори дигар ба намо мегузорад.
Дар  чорабинии фарҳангӣ синамогарони тоҷик филмномаҳои ҷолиберо, аз қабили «Муаллим», «Рустам ва Суҳроб», «Ман бо духтаре вохўрдам», «Танҳо осмон баланд аст», «Гунҷишки сафед», «Мўъминобод», «Кўлоб», «Даҳшати ҷанг», «Тақдири шоир» ва «Ойинаи беҷило» ҳамчун дастовез ба армуғон овардаанд, ки метавонанд писанди ҳаводорони ҳунар дар Озарбойҷон гарданд.