Ҳодисаи нохуш дар роҳи Айнӣ-Панҷакент

Душанбе, 04.03.2015. (АМИТ «Ховар», Муқаддас Темурзода).- Дирӯз тахминан соати 17:00 дақиқа ронандаи мошини “Opel-Astra”,  Бузургмеҳр Саъдиев, соли таваллудаш 1993, ноҳияи Панҷакент ҳангоми ҳаракат бо роҳи мошингарди Айнӣ-Панҷакент аз уҳдаи идораи воситаи нақлиёт набаромада, дар канори роҳ чаппа шудааст. Дар натиҷа худи ронанда Б. Саъдиев ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Ҳамчунин дар ин рӯз тахминан соати 17:30 дақиқа ронандаи мошини  “Opel-Astra”  Шариф Қандов, соли таваллудаш 1973, сокини деҳаи Меҳрободи ноҳияи Фархор ҳангоми ҳаракат дар ҳудуди деҳаи Меҳробод аз уҳдаи идораи воситаи нақлиёт набаромада, ба тарафи рости роҳ чаппа шудааст. 
Дар натиҷа ронанда ва мусофиронаш Исматулло Кенҷаев, соли таваллудаш  1974, Амриддин Раҷабов, соли таваллудаш 1975 ва Исмоил Сангов, соли таваллудаш 1977 ҷароҳати гуногуни ҷисмонӣ бардошта, дар беморхонаи марказии ноҳия бистарӣ шудаанд. 
Пас аз чанд соат шаҳрванд И. Кенҷаев дар беморхона ба ҳалокат расидааст. Дар ин бора ВКД ҶТ хабар медиҳад.
 Тибқи маълумоти ВКД ҶТ соли 2014 дар ҷумҳурӣ 1 ҳ. 514 ҳодисаи нақлиётӣ ба қайд гирифта шуда, дар натиҷаи он 446 нафар ба ҳалокат расидааст.