Хуҷанд: «Мехчагули туркӣ» мешукуфад

Душанбе, 5.03.2015. (АМИТ «Ховар», Мавҷуда Анварӣ).-Дар гармхонаҳои Муассисаи давлатии кабудизоркунии шаҳри Хуҷанд зиёда аз 30 ҳазор дона гули лола парвариш меёбад.
Пиёзаки ин намуди гул ҳанӯз моҳи ноябри соли 2014 кошта шуда буд. Маҳз нигоҳубини саривақтӣ ва риояи тамоми талаботи агротехнологӣ боис гардид, ки ин намуди гулҳои баҳорӣ дар шароити гармхона хуб нашъунамо ёбад. Ҳоло қисми аввали 5 намуди лолаҳои гуногунранг ба шукуфтан оғоз намуд.
Тибқи дастури раиси шаҳри Хуҷанд Раҷаббой Аҳмадзода тамоми лолаҳои ин гармхона кӯчаю хиёбонҳои маркази вилоятро дар арафаи Иди Наврӯзи оламафрӯз оро хоҳад дод.
Ҳамчунин кормандони ин муассиса дар гулгаштҳои шаҳр имрӯзҳо қаламчаҳои гули садбаргро шинонда истодаанд. 
Дар айни замон дар гармхонаҳо 5 навъи гулҳои ороишӣ, аз қабили «Мехчагули туркӣ», садбаргҳои гуногуни ҳарранга, гулҳои маҳаллӣ парвариш ёфта  истодаанд.