Маросими супоридани нусхаҳои эътимодномаҳои сафирон ба С.Аслов

  Душанбе, 10.03.2015. (АМИТ «Ховар»).-Субҳи 9 марти соли 2015 маросими супоридани нусхаҳои эътимодномаҳои сафирони навтаъйини чор давлати хориҷӣ ба вазири корҳои хориҷии Тоҷикистон Сироҷидин Аслов баргузор гардид.
Нусхаҳои эътимодномаҳои худро сафирони фавқулода ва мухтори Ҷумҳурии Исломии Покистон Тариқ Иқбол Сумро, Салтанати Умон Саид бин Аҳмад бин Халид ал-Барванӣ, Ҷумҳурии Сотсиалистии Ветнам Фан Ван Фао ва Ҷумҳурии Федеративии Демократии Ҳабашистон (Эфиопия) Айалаев Гобезие Воркенеҳ супориданд.
Пас аз маросим, мулоқотҳои дуҷонибаи вазири корҳои хориҷӣ бо сафирони навтаъйин доир гардиданд, ки зимни онҳо ҳолати кунунӣ ва дурнамои рушди муносибатҳои Ҷумҳурии Тоҷикистон бо он кишварҳо мавриди баррасӣ қарор гирифтанд.
С. Аслов сафиронро бинобар ба ин вазифа таъйин шуданашон табрик намуда, ба онҳо ҷиҳати амалигардонии фаъолияти касбиашон комёбиҳо таманно намуд.