Муаррифии минтақаи озоди «Суғд» дар Арок

  Душанбе, 6.03.2015.(АМИТ «Ховар», Марзия Саидзода).- Дар шаҳри Арок — маркази устони Марказии Эрон Форуми соҳибкорӣ баргузор гардид, ки дар он зарфиятҳо ва иқтидори минтақаи озоди Суғд муаррифӣ гардиданд. Дар  форум, ки бо ибтикори Палатаи   бозаргонии Арок баргузор гардид, Сафири Фавқулода ва Мухтори Ҷумҳурии Тоҷикистон дар Ҷумҳурии исломии Эрон — Неъматулло Эмомзода, раиси минтақаи озоди Суғд Фирдавс Алимов ва мудири шуъбаи сармоягузориҳои хориҷӣ Мирзоманнон Мирзоолимов ширкат доштанд. Дар ҳошияи ин барнома Н. Эмомзода зимни боздид аз тавонмандиҳои шаҳри Арок бо Ҳасани Бегӣ -раиси  вилояти Марказӣ ва муовинонаш Муҳаммадризо Ҷаъфарзода -раиси палатаи бозаргонӣ, саноеъ ва маъдани ин вилоят мулоқот намуда, дар бораи заминаҳои тақвияти ҳамкориҳои иқтисодии ду кишвар табодули назар карданд.
   Ҳамчунин ҷаласаи кории гурӯҳи тавсеаи содироти вилояти  Марказӣ бо иштироки 50 нафар аз мудирони иқтисодии  ин вилоят, ,раисони ширкатҳои давлатӣ ва хусусӣ барпо шуд, ки дар он масъалаҳои умдаи беҳтар кардани равобити иқтисодӣ ва тиҷоратии дуҷониба мавриди баррасӣ қарор гирифтанд. Муҳаммадризо Ҷаъфарзода — раиси Палатаи бозаргонии Арок зарфиятҳои устони Марказӣ ва шаҳри Арокро муаррифӣ намуд. Мавсуф зикр кард, ки Арок иқтидорҳои зиёд дорад, барои мисол шаҳристони Дилиҷон бо маҳсулоти пӯшиши бом (изугом), шаҳристони Маҳаллот бо парвариши гулу гиёҳ ва худи шаҳри Арок бо корхонаи алюминии Арок маъруфият дошта, илова намуд, ки ин устон бо вижагиҳои фарҳангӣ ва таърихӣ дар шоҳроҳҳои иртиботии шимол ба ҷануб ва шарқ ба ғарб қарор дорад ва дар ин замина имкониятҳои фаъолтар шудани табодули иқтисодии Арок бо Тоҷикистон вуҷуд дорад.
     Зикр шуд, ки бо таваҷҷуҳ ба муштаракоти фаровони фарҳангӣ байни Тоҷикистон ва Эрон боздиди сафирон метавонад оғози фаъолтар шудани ҳамкорӣ байни кишварҳо гардад. Дар ин замина,  пешниҳод гардид, ки барои пайгирии масъалаҳои матраҳшуда,  миёни устони Марказӣ ва Тоҷикистон як гурӯҳи корӣ ташкил шавад. 
     Ҳамзамон  Сафири Тоҷикистон дар бораи се ҳадафи асосии стратегӣ ва фазои сармоягузорӣ дар Тоҷикистон, хусусан лоиҳаҳои иқтисодӣ, низом ва шароити гумрукӣ, андоз ва имтиёзҳои ҷумҳурӣ барои сармоягузорони хориҷӣ маълумоти муфассал пешниҳод намуд.