Оғози марҳилаи ниҳоии Ҷоми ФФТ

Душанбе, 4.03.2015. (АМИТ Ховар, Ситораи Боймурод).- Марҳилаи ниҳоии Ҷоми Федератсияи футболи Тоҷикистон имрӯз, дар шаҳри Душанбе, дар Варзишгоҳи марказии ҷумҳуриявӣ оғоз меёбад. 
Тавре ки дар ин бора Кумитаи миллии олимпии кишвар хабар додааст, дар сабқати ниҳоӣ ҳашт даста ширкат меварзад. Инҳо ду дастаи беҳтарини минтақаи Хатлон —  «Равшан»-и Кӯлоб ва «Данғара»-и Данғара, ду дастаи беҳтарини минтақаи Суғд — «Хуҷанд»-и Хуҷанд ва «Қайроққум»-и Қайроққум, чаҳор дастаи минтақаи Душанбе — «Истиқлол-и Душанбе, ССКА «Помир-и Душанбе), «Регар-ТадАЗ»-и Турсунзода ва «Хайр»-и Ваҳдат мебошанд. 
Гуфта мешавад, ки дастаҳо ба ду гурӯҳ тақсим шудаанд: гурӯҳи «А» — CСКА «Помир» (Душанбе), «Хайр» (Ваҳдат), «Хуҷанд» (Хуҷанд) ва «Данғара» (Данғара), гурӯҳи «Б» — «Истиқлол» (Душанбе), «Қайроққум» (Кайроққум), «Равшан» (Кӯлоб) ва «Регар-ТадАЗ» (Турсунзода). 
Дастаи ғолиби марҳилаи ниҳоӣ, ки 15-уми март маълум мешавад, бо Ҷом, медалҳои тилло ва ҷоизапулӣ ба маблағи 20 ҳазор сомонӣ сарфароз мегардад. Ба дастае, ки ҷойи дувумро мегирад, медалҳои нуқра ва ҷоизапулӣ ба маблағи 15 ҳазор сомонӣ ва ба дастае, ки ҷойи севумро мегирад, медалҳои биринҷӣ, инчунин 10 ҳазор сомонӣ супурда хоҳанд шуд.