Оила- асоси пойдории давлат

Душанбе,03.03.2015 (АМИТ “Ховар”, Рафоати Абдулҳамид).- Бо иштироки донишҷӯёни факултетҳои кибернетика, санъати тасвирӣ ва технология, физикаю техника ва математика дар факултети физикаю техникаи Донишгоҳи давлатии Хуҷанд ба номи академик Бобоҷон Ғафуров чорабинӣ бахшида ба муносибати соли 2015-соли оила ва рӯзи байналмилалии занону бонувон дар мавзӯи “Маърифати оиладорӣ- калиди хушбахтӣ” гузаронида шуд.
Тавре ки Хадамоти матбуоти раиси вилояти Суғд хабар додааст, дар чорабинӣ  декани факултети физикаю техника Раҳимҷон Назаров роҷеъ ба масъалаҳои омодагӣ ба оиладорӣ, саҳми занону бонувон дар ҷомеаи имрӯз, баланд бардоштани мақоми зан дар ҷомеа, ҳуқуқу уҳдадориҳои ҳамаи ҷавонон, дар бораи вайроншавии оилаҳои ҷавон ва бисёр мушкилиҳое, ки ба оилаву оиладорӣ мутааллиқанд, сухан гуфт.
Дар чорабинӣ таъкид шуд, ки мутаассифона, имрӯз дар ҷомеа сафи бекоршавии ақди никоҳи оилаҳои ҷавон афзуда истодааст, ки ин боиси нигаронист. Инчунин мушкилоти дигар он аст, ки никоҳи хешутаборӣ бисёр шуда истодааст ва аз нигоҳи олимони соҳаи тиб ин амал боиси носолимии кӯдакони навзод мегардад.