Паҳнкунандаи ҳашиш дастгир шуд

Душанбе, 4.03.2015. (АМИТ «Ховар», Мавҷуда Анварӣ).- Дар натиҷаи гузаронидани амалиёти кормандони Агентии назорати маводи нашъаовари кишвар дар шаҳри Душанбе се шаҳрванд бо маводи нашъаовар дастгир гардид.
Дар наздикии нуқтаи фурӯши сӯзишвории пойтахт зодаи 24-солаи ноҳияи Рӯдакӣ дастгир шуд, ки аз дохили кулоҳаш як адад бастаи маводи нашъаовари ҳашиш мусодира гардид.
Тафтишот нишон дод, ки дастгиршуда маводи нашъаоварро аз шиноси 24-солаи худ — зодаи шаҳри Турсунзода, ҳоло сокини пойтахт харид намудааст. 
Дар натиҷаи андешидани тадбирҳои иловагӣ фурӯшандаи эҳтимолии маводи нашъаовар дар мошини тамғаи «Mercedes-Benz» дастгир шуд. Ҳангоми кофтукови мошин бо истифода аз саги хизматӣ аз таги хокистардони он як адад бастаи маводи нашъаовари ҳашиш ёфт гардид.
Нисбат ба ин ҳодиса парвандаи ҷиноӣ оғоз гардидааст.