Санҷиши комиссарони ҳарбӣ чӣ натиҷа дод?

Душанбе, 05.03.2015. АМИТ «Ховар», Лайло Тоирӣ).-Дар асоси нақшаи чорабиниҳои масъулини Ситоди генералии Қувваҳои Мусаллаҳ дар пойгоҳи Донишкадаи ҳарбии Вазорати мудофиаи мамлакат ва бинои комиссариатҳои ҳарбии ноҳияҳои Рӯдакӣ ва Синои пойтахт муддати се рӯз ба таври назариявию амалӣ ҷамъомади масъулини комиссариатҳои ҳарбӣ ҷараён гирифт. Дар ҷараёни ҷамъомад ҳайати он вобаста ба қонунҳои амалкунандаи мамлакат, тартиби ҳуҷҷатгузорӣ ҳангоми мудофиаи ҳудудӣ, омодагии сафарбарӣ, ба қайди ҳарбӣ гирифтани захираҳои эҳтиётии даъватшавандагон, техникаҳои хоҷагии халқ, масоили вобаста ба ҷобаҷогузории кадрҳо, ташкили комиссияҳои даъватӣ ва дигар масъалаҳое, ки дар самти фаъолияти рӯзмараи комиссариатҳои ҳарбӣ заруранд, мавриди омӯзиш қарор гирифт.
Қобили зикр аст, ки чунин ҷамъомад ё машғулиятҳои таълимӣ ҳар сол дар ҷараёни давраҳои тобистонаву зимистонаи омӯзишӣ дар Қувваҳои Мусаллаҳ доир мешаванд.
Дар ин бора ба АМИТ «Ховар» аз хадамоти матбуоти Вазорати мудофиаи ҶТ иттилоъ доданд.