«Тоҷикистон ватани Наврӯз аст»: маҷмӯаи нав

Душанбе, 03.03.2015.(АМИТ «Ховар», Марзия Саидзода).- «Тоҷикистон Ватани Наврӯз аст»-таҳти чунин унвон дар остонаи ҷашни Наврӯз муассисаи нашриявии «Адабиёти бачагона»-и Вазорати фарҳанги кишвар  маҷмӯаи шеърҳои Шоири халқии Тоҷикистон Муҳаммад Ғоибро аз чоп баровард.
      Дар маҷмӯа шеърҳои дар васфи баҳор ва Наврӯзи ҳуҷаста  эҷоднамудаи шоири шинохтаи тоҷик  гирд оварда шудаанд. 
    Маҷмӯа бо теъдоди 1000 нусха мунташир гардида, ҳадяи наврӯзиест барои  наврасони кишвар. 
     Муҳаммад Ғоиб муаллифи 40 китоб буда, дар чандин анҷуманҳо дар хориҷи кишвар ширкат варзида, бузургии адабиёти тоҷикро муаррифӣ намудааст.
             Офаридаҳои назмию насрии ӯ дар маҷмӯаҳои «Роҳи деҳа», «Меҳргиёҳ», «Лолаи чашм», «Сурати ишқ», «Дидор», «Сад ғазал», «Гавҳар», «Хоки ватан», «Парчами нанг», «Хирмани гул», «Дарди ширин», «Қиблаи умед», «Каъбаи дил», «Ашки қалам», «Фарёди ёдҳо», «Ифтихор», «Гумгаштапайдо» мунташир гардидаанд.   
Шоири халқии Тоҷикистон Муҳаммад Ғоиб барои хизматҳои шоён дар ташаккули адабиёти тоҷик бо Ҷоизаи давлатии Тоҷикистон ба номи Абӯабдуллоҳи Рӯдакӣ сарфароз гардидааст.