Ярмаркаи фурӯши маводи ғизоӣ дар Душанбе

Душанбе, 06.03.2015. (АМИТ Ховар, Рафоати Абдулҳамид).- Масъулини Агентии захираҳои моддии давлатии назди Ҳукумати Ҷумҳурии Тоҷикистон ярмаркаи навбатии фурӯши маводи ғизоиро барои сокинону меҳмонони шаҳри Душанбе баргузор намуд. Дар ярмарка навъҳои гуногуни маводи ғизоии ниёзи аввал пешкаши харидорон  шуд.
Тавре ки гуфта шуд, маҳсулоти ярмарка дар қиёс ба нархи бозор нисбатан арзонтар буд. Дар маҷмӯъ, дар ярмарка 30 тонна орд, 6 тонна шакар, 6 тонна маҳсулоти донагӣ, 6 тонна биринҷ, 3 тонна равған ва навҳои гуногуни маҳсулоти консерва пешкаши хоҳишмандон гардид. 
Тавре ки иттилоъ дода шуд, имрӯзҳо бо мақсади муътадил нигоҳ доштани нархҳо дар бозорҳои кишвар ва мусоидат ба ғанӣ гардонидани дастурхони сокинон аз ҷониби намояндагиҳои Агентии захираҳои моддии давлатии назди Ҳукумати Ҷумҳурии Тоҷикистон дар шаҳру навоҳии кишвар ташкили ярмаркаҳои фурӯши маҳсулоти хӯрокӣ ҷараён дорад.