170 хоҷагӣ аз минтақаҳои хавфноки экологӣ кӯчонида шуд

Душанбе, 09.07.2015. (АМИТ «Ховар», Лайло Тоирӣ).- Дар  шаш моҳи соли 2015 аз минтақаҳои хавфноки экологӣ  170 хоҷагӣ кӯчонида шуда,  дар мавзеъҳои бехавф бо қитъаи замини наздиҳавлигӣ барои сохтмони манзили истиқоматӣ таъмин гардид. Аз ҷумла дар  ВМКБ ба 12 хоҷагӣ, дар вилояти Суғд ба  30 хоҷагӣ, дар вилояти Хатлон ба 107 хоҷагӣ, дар  ноҳияҳои тобеи ҷумҳурӣ ба  21 хоҷагӣ қитъаи замин ҷудо гардид . 
Тавре ки сухангӯи Хадамоти муҳоҷират А. Қодирӣ иттилоъ дод, дар ҳамкорӣ бо сохторҳои дахлдори мақомоти иҷроияи ҳокимияти давлатии шаҳру ноҳияҳои ҷумҳурӣ, барои аз минтақаҳои хавфнок кӯчонидани 350 хоҷагии муҳоҷири экологии дар ин мавзеъҳо ҷойгир буда, тадбирҳои зарурӣ андешида шуданд.  
Дар қитъаҳои ҷудо гардида  сохтмони  манзили истиқоматӣ аз ҷониби муҳоҷирон идома дорад. 
Инчунин муҳоҷирон аз ҷониби Хадамоти муҳоҷират бо қарзи имтиёзнок ва кумаки якдафъаинаи моддӣ таъмин гардиданд.