4 млн. 621 ҳазор сомонӣ — маблағҳои ҳаққи суғуртавӣ

Душанбе, 31.07.2015. (АМИТ «Ховар», Раъно Нусратуллозода).-Корхонаи воҳиди давлатии «Тоҷиксуғурта» фаъолияти кории худро бо ду шакл- суғуртаи ихтиёрӣ ва ҳатмӣ амалӣ мегардонад. Имрӯз корхона аз рӯи 28 намуди суғурта ба аҳолӣ хизмат расонида истодааст, ки 13 намудаш суғуртаи ҳатмӣ ва 15 намудаш суғуртаи ихтиёрӣ мебошад. Дар ин бора имрӯз зимни нишасти матбуотӣ директори генералии КВД «Тоҷиксуғурта» Сатторӣ Аловуддин Мирзо иттилоъ дод.
Дар нимсолаи аввали соли равон барои ҳамаи намудҳои суғурта 29 миллиону 911 ҳазор сомонӣ маблағҳои ҳаққи суғуртавӣ ворид гардида, нақшаи пешбинишудаи ҳамин давра дар умум  103 фоиз ва аз рӯи намудҳои ихтиёрии суғурта 138 фоиз иҷро гардид. 
Инчунин дар нишаст гуфта шуд, ки дар нимсолаи аввали соли  ҷорӣ аз ҳисоби маблағҳои ҳаққи суғуртавии воридгардида, ба буҷетӣ ҷумҳурӣ 4 миллиону 621 ҳазор сомонӣ гузаронида шуд, ки аз он 1 миллиону 885 ҳазор сомониро пардохтҳои суғуртаи иҷтимоӣ ташкил медиҳанд.