А. Бобоев: 10 корхонаи истеҳсолӣ соҳиби сертификати назорати сифат шуд

Хуҷанд, 29.07.2015. (АМИТ «Ховар»).- Сардори Маркази стандартизатсия, метрология, сертификатсия ва нозироти савдои вилояти Суғд Аюбҷон Бобоев зимни нишасти матбуотии марказ гуфт, ки дар шашмоҳаи аввали соли ҷорӣ  самти асосии фаъолияти Маркази «Тоҷикстандарт» дар вилояти Суғд идомаи татбиқи барномаи давлатии сифат барои солҳои 2013-2015 буд. Тибқи маълумоти бахши низоми идораи сифат дар соли 2015 бояд дар 20 корхонаи истеҳсолии вилоят низоми идораи сифат ҷорӣ  мешуд, ки иҷрои он фақат дар ду корхона таъмин  гардид. Тибқи гузориши сардори Марказ дар давоми як соли охир бо 32 субъекти хоҷагидор, берун аз барнома, шартнома оид ба ҷорӣ намудани низоми идораи сифат дар асоси талаботи мавҷуда баста шуда, дар 9 субъекти хоҷагидор корҳо ба анҷом расонида шуданд ва дар 23 субъекти хоҷагидор корҳо ҷараён доранд. Аюбҷон Бобоев афзуд, ки дар нимсолаи аввали соли равон 10 корхонаи истеҳсолии вилояти Суғд соҳиби сертификати ҷорӣ намудани назорати идораи сифат (НИС) гардид.