Ғалабаи бузурги «Равшан»- бар дастаи “Помир”-и Душанбе

Душанбе, 27.07.2015.(АМИТ «Ховар», Меҳрони Курбон).-Шоми дирӯз  чаҳор бозии дигари даври ҳаштякниҳоии Ҷоми Тоҷикистон ба поён расид. Дастаи  «Равшан»-и Кӯлоб  дар Варзишгоҳи марказии ҷумҳуриявии пойтахти кишвар ба дарвозаи дастаи “Помир”-и Душанбе, ки аз ҳисоби бозингарони тими мунтахаби наврасони то 16-солаи Тоҷикистон ташкил ёфтааст, нӯҳ голи беҷавоб зад. Ёдовар  мешавем, ки  голҳои дастаи «Равшан»-и  Кӯлобро    Шодибек Ғаффоров, ки се бор тӯбро вориди дарвозаи мизбонон намуд, хет-трик кард. Наврӯз Рустамов ду гол, Саидхони Амрохон, Бахтиёр Қаландаров, Акуффо Гершон ва Абдурасул Раҳмонов якголӣ ба нишон расонданд.
Хотиррасон  менамоем, ки  се бозии дигаре, ки рӯзи  26 июл баргузор шуд, чунин аст: Дастаи «Вахш»-и  Қӯрғонтеппа  дастаи «Исфара»-и  Исфара — ро  бо ҳисоби бузурги 7-0 шикаст  дод. Бозии дастаи «Далерон-Ӯротеппа»- и  Истаравшан  бо дастаи  «Барқи тоҷик»-и Душанбо бо  ҳисоби  0-2 ва  бозии дастаи  «Чашма»-и Шаҳритус бар  дастаи «Регар-ТадАЗ»-и  Турсунзода бо  ҳисоби  3-5  ба анҷом   расид.
Ёдовар  мешавем, ки бозиҳои ҷавобии даври ҳаштякниҳоии Ҷоми Тоҷикистон-2015 рӯзҳои 4-5 август дар   варзишгоҳои  марказии  шаҳри Душанбе  баргузор мешаванд.