Ҳамлаи худкуш ба бозори серодами музофоти Форёб

Душанбе, 22.07.2015. (АМИТ «Ховар»). — Субҳи рӯзи чоршанбе дар минтақаи Алмари ҳудуди шимолии музофоти Форёби Афғонистон худкуше дар издиҳоми одамон худро тарконд.
Таркиш тақрибан соати 11:45 бо вақти маҳаллӣ ба вуқуъ пайваста, ҳадафи он эҳтимолан куштани кормандони ҳифзи ҳуқуқ буд. Дар баробари ин асосан сокинони осоишта қурбони ҳодиса гардиданд. Бино ба иттилои оҷонсии «Хома пресс», дар натиҷаи таркиш зиёда аз 10 нафар ҳалок гашта, 30 нафари дигар ҷароҳатҳои гуногуни ҷисмонӣ бардоштанд.
Аз рӯи ин ҳодиса тафтиш идома дорад. То ҳол ҳеҷ яке аз гурӯҳҳои оштинопазири мусаллаҳи мухолиф ҳамлаи худкушро ба зимма нагирифтааст.