Бадахшон бо нерӯи барқ таъмин гардид

Душанбе, 18.07.2015. (АМИТ «Ховар»). – Имрӯз бо талошҳои пайвастаи Ҳукумати мамлакат аз соати 19:00 бегоҳ дар Вилояти Мухтори Куҳистони Бадахшон, ки тайи беш аз як рӯз бо сабаби баланд шудани оби дарёҳои минтақа нерӯгоҳҳои “Помир-1” ва “Хоруғ” муваққатан аз кор боз дошта шуда буданд, дубора нерӯи барқ таъмин гардид. Масъулини ҳукумати вилоят ба АМИТ «Ховар» иттилоъ доданд, ки дар баробари фаъол гардидани нерӯгоҳҳои барқии вилоят насосҳои обкашонӣ низ фаъол карда шуданд. Айни ҳол аҳолии вилоят бо нерӯи барқ ва оби тозаи ошомиданӣ пурра таъмин гардиданд. «Бо назардошти рафти корҳои бартқарорсозии оқибатҳои офати табиӣ нерӯи барқ ба аҳолӣ дар як шабонарӯз 14 соат ва ба ташкилоту муассисаҳои иҷтимоӣ ва идораҳои давлатӣ пурра дода мешавад», — таъкид дошт манбаъ.