Боздиди Қ. Расулзода аз мавзеъҳои хавфноки наздисоҳилии дарёи Панҷ

Душанбе, 02.07.2015. (АМИТ «Ховар»). — Бо дастури  Президенти Ҷумҳурии Тоҷикистон  имрўз  Сарвазири мамлакат  Қоҳир  Расулзода аз мавзеъҳои хавфноки наздисоҳилии дарёи Панҷ дар ноҳияи Мир Сайид Алии Ҳамадонии вилояти Хатлон дидан карда, бо ҷараёни  корҳои  мустаҳкамкунии соҳил  шинос  шуд.
Қоҳир Расулзода бо  корҳои мустаҳкамкунии соҳил, ки бо дастгирӣ ва  маблағгузории  ҳукумати мамлакат аз ҷониби Агентии беҳдошти замин ва обёрии  назди Ҳукумати Ҷумҳурии Тоҷикистон анҷом дода  мешаванд,  дар мавзеъҳои нисбатан хавфноки Сарбанд ва Хатлони  соҳили  дарёи  Панҷ   ва  мавзеи  наздик ба канали Чӯбек  шинос  шуд.
Тавре ки таъкид гардид, дар сарбанди канали Чӯбек  бо мақсади таҳкими  соҳили ин иншооти обрасон  240  адад  хишти  калонҳаҷми бетонӣ хобонида шуда,  барои эҳтиёт боз 100 адад чунин масолеҳи соҳилбандӣ захира  шудааст. Бо дастури  Сарвари  давлат ба тариқи иловагӣ барои пешбурди корҳои мустаҳкамкунии соҳил  миқдори зарурии масолеҳи сохтмонӣ ва сўзишворӣ ҷудо  гардидааст, ки барои омода намудани хиштҳои бетонии калонҳаҷм пешбинӣ шудаанд. 
 Бо мақсади сари вақт ва бо сифати баланд анҷом додани корҳои мустаҳкамкунии соҳил  ва  пешгирӣ намудани хавфи обхезиҳо дар маҳаллаҳои  наздик ба соҳил   дастур дода шуд, ки масолеҳи зарурӣ  барои корҳои мустаҳкамкунии соҳил,  аз қабили сўзишворӣ, семент, хиштҳои  бетонӣ  ва  симтӯр  ба  миқдори  зарурӣ  захира шаванд.
Дар  мавсими гармои имсола  маҷрои дарё нисбат ба солҳои қаблӣ  нисбатан сероб буда, эҳтимолияти сар задани обхезӣ ва шуста бурдани саддҳои соҳилбанд  афзун мебошад. Вобаста  ба  ин аз масъулини дахлдор талаб карда шуд, ки барои пешбурди корҳои асосии мустаҳкамкунии соҳил,  пеш аз ҳама бояд барои барқарор намудани фаъолияти  коргоҳи  коркардаи  сангу  шағал  ва  қум тадбирҳо андешида,  шумораи  техникаи кориро афзун намоянд. Ҳамчунин масъулини  соҳа, роҳбарияти вилоят ва ноҳия вазифадор гардиданд, ки   корҳои асосии мустаҳкамкунии соҳилро    дар  се баст ба роҳ монда,  барои    назорати  сатҳи  об  ва  маҷрои  дарё дар ин мавзеъҳо навбатдории шабонарўзӣ ташкил намоянд.