Боздошти марди 53-сола барои таҷовуз ва куштори духтари 6-сола

Хуҷанд, 02.07.2015. (АМИТ «Ховар»,Абдуаҳад Шарифзода).- Кормандони милитсияи вилояти Суғд зимни гузаронидани чорабинии фаврӣ-ҷустуҷӯӣ марди 53 солаеро бо гумони даст доштан дар таҷовуз ва куштори духтарчаи 6-сола боздошт карданд.  Ба иттилои манбаъ 30 июни соли ҷорӣ дар шаҳри Хуҷанд  аз ҷониби шахси номаълум духтараки 6 сола мавриди таҷовуз қарор гирифта, баъдан кушта шудааст. Ҷасади духтарча бегоҳии 30 июн, тахминан соати 20:30 аз байни мошинсаройҳои назди кӯчаи Аминҷон Шукуҳии шаҳр бо аломатҳои марги маҷбурӣ ва нишонаҳои алоқаи ҷинсии маҷбурӣ дарёфт гардидааст.
Тавре  роҷеъ ба ходисаи мазкур  аз мақомоти ҳифзи ҳуқуқ иттилоъ доданд,  ин мард қаблан  бо оилаи духтарча дар як маҳалла, дар як бинои истиқоматӣ зиндагонӣ мекардааст.  
Ба иттилои манбаъ, марди гумонбаршуда  дар гузашта се маротиба, аз ҷумла барои куштор ва таҷовуз ба номус суд шудааст.
Алъон вобаста ба ҳодисаи мазкур нисбат ба айбдоршаванда тибқи моддаҳои 104 (Куштор) ва 138 (Таҷовуз ба номус) парвандаи ҷиноӣ  боз шудааст.