Дар кӯчаи «Бухоро»-и Душанбе нимпайкараи Робиндранат Такур гузошта мешавад

Июль 9, 2015 11:34

       Душанбе, 09.07.2015.(АМИТ «Ховар», Марзия Саидзода).- Дар гулгашти кӯчаи «Бухоро»-и Душанбе — буриши кӯчаи Турсунзода нимпайкараи яке аз шахсиятҳои бузурги Ҳиндустон, шоир ва нависандаи машҳури Ҳинд  Робиндронат Такур (1861-1941) гузошта мешавад. Интизор меравад, ки  парда аз рӯи нимпайкараи ходими намоёни ҷамъиятии Ҳиндустон дар рӯзҳои сафари давлатии Сарвазири Ҳинд Нарендра Модӣ ба Ҷумҳурии Тоҷикистон, ки рӯзҳои 12-13 июл дар назар аст, бардошта шавад. Нимпайкараи Робиндронат Такур бо маблағгузории ҷониби Тоҷикистон ва Ҳиндустон бунёд гардида, меъмори он Зуҳуриддин Сироҷиддин -яке аз меъморони шинохтаи Тоҷикистон аст. Ин дар ҳолест, ки дар масофаи начандон дур, тахминан сад метр дуртар  аз ин гулгашт  дар кӯчаи Бухоро,  51 нимпайкараи яке аз ходимони барҷастаи сиёсии Ҳиндустон, доҳии мардуми ҳинд  Маҳатма Гандӣ (1861-1941) гузошта шудааст. Ҳамзамон дар ҳамин кӯча — Бухоро, 45 бинои сафорати Ҳиндустон воқеъ аст. 
         Ашурбег Расулов- муовини аввали раиси шаҳри Душанбе дар суҳбат ба хабарнигори АМИТ «Ховар» гуфт, ки аз ҷониби шаҳрдорӣ ба ифтихори сафари давлатии Сарвазири Ҳиндустон ба Тоҷикистон корҳои ободонию сабзкорӣ дар кӯчаи Бухоро- аз чорроҳаи бинои «Душанбе-Плаза» то буриши кӯчаи Мирзо Турсунзода /Донишгоҳи славянӣ/  бо суръат идома доранд. Махсусан дар гулгаште, ки дар он нимпайкараи Робиндранат Такур гузошта мешавад, гулу буттаҳои гуногуни ороишӣ шинонида шуда, роҳравҳо бунёд гардидаанд, инчунин намои берунии  иморати идораҳои дорои  таъйиноташон гуногун, ки дар ин кӯча воқеанд, ранг карда шуда, тамоми дарахтони ду тарафи роҳи ин кӯча ба тартиб дароварда шудаанд.
      Ашурбег Расулов афзуд, ки корҳои созандагию бунёдкорӣ ва сабзкорӣ дар гулгашти кӯчаи Бухоро аз ҷониби  Раёсати сохтмони асосии шаҳр (фармоишгар), ширкати «Хонасоз-4» (пудратчӣ) ва КВД «Сабзкор» ҷараён доранд. 

Июль 9, 2015 11:34

Хабарҳои дигари ин бахш

Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Имрӯз дар шаҳри Душанбе ҳаво то 16 дараҷа гарм мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Имрӯз дар водиҳои Тоҷикистон ҳаво 18 дараҷа гарм мешавад
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд