Дар музофоти Урузгон Толибон оқсақолро ба дор кашиданд

Душанбе, 22.07.2015. (АМИТ «Ховар»). — Субҳи чоршанбе дар ҳудуди  ҷанубии музофоти Урузгони Афғонистон Толибон дар назди мардум оқсақоли маҳаллӣ Ҳоҷӣ Аббосро, ки дар шӯрои музофот кор мекард, ба дор кашиданд.
 Ҷинояткорон ходими давлатиро рабуда, ӯро дар назди мардум ба дор овехта, ҷасадашро дар ҷои куштор гузоштанд. 
 Ҳокимияти маҳаллӣ аз эълони сабаби ҳодиса худдорӣ мекунад, вале эҳтимолан баҳонаи ба қатл расондани оқсақол ҳамкории Ҳоҷӣ Аббос бо ҳукумати расмӣ бошад.
 То ҳол ягон гурӯҳи оштинопазири мусаллаҳи мухолиф дар ин ҳодиса даст доштанашро изҳор накардааст, вале пештар чунин ҷиноятҳоро Толибон борҳо зидди оқсақолон анҷом дода буданд.
 Ёдовар мешавем, ки як ҳафта пеш дар шимоли музофоти Самангон ҷангиёни Толибон мулло Абдул Сатторро, ки дар хатибаҳояш борҳо фаъолияти ошӯбгаронро маҳкум карда буд, ба қатл расонданд.