Дар Суғд беш аз 200 ҳазор нафар корти пластикӣ дорад

Хуҷанд, 27.07.15. (АМИТ «Ховар»). – Дар  вилояти  Суғд  теъдоди соҳибони  кортҳои  пластикии «Амонатбонк» ба беш  аз  201 ҳазор нафар расидааст. 
Тавре ки шуъбаи Бонки давлатии амонатгузории «Амонатбонк» дар  вилояти Суғд хабар  медиҳад,  имрӯз кормандони  ҳамаи созмону  корхонаҳои  буҷавии  18  шаҳру  ноҳияҳои  вилояти  Суғд маошашон, аз ҷумла  нафақахӯрони шаҳрҳои Хуҷанд, Истиқлол,  Исфара, Истаравшан, Қайроқум, Чкалов,  ноҳияҳои Спитамен, Ашт ва Айнии  вилоят, ки 105 ҳазору 334 нафарро ташкил  медиҳанд, нафақаҳояшонро  бо  истифода  аз кортҳои  пластикии «Амонатбонк»  мегиранд. 
То охири соли  равон  нафақахӯрони  ноҳияҳои Шаҳристон,  Конибодом ва Ҷаббор  Расулов низ нафақаҳояшонро тавассути  кортҳои  пластикӣ  хоҳанд  гирифт.
То имрӯз 1367 корхонаю  ташкилоти  вилоят барои  гирифтани маош бо  истифода  аз  кортҳои пластикии «Амонатбонк» шартнома  бастаанд, ки теъдоди кормандонашон 93  ҳазору  888  нафар, ё  46,7  фоизи  шумораи  умумии  дорандагони  кортҳои пластикиро ташкил  медиҳад.
Ёдовар  мешавем, ки дар ҳудуди вилояти  Суғд  37 банкомати  махсус, 182 терминали назоратӣ ва  145  маркази хидматрасонии  бонк  фаъолият  доранд.