Файзобод: қисми даромади буҷа 99 фоиз иҷро шудааст

Файзобод, 27.07.2015. (АМИТ «Ховар», Субҳониддини Маҳмуд).-Имрӯз, 27 июл дар ноҳияи Файзобод нишасти матбуотии  мақомоти иҷроияи ҳокимияти давлатии ноҳия баргузор гардид. Раиси ноҳия Раҷабзода Миралӣ  оид ба   натиҷаҳои  рушди иҷтимоиву  иқтисодии ноҳия дар нимсолаи  аввали соли 2015 гуфт, ки иҷрои буҷа дар қисми даромад  ба андозаи 16 млн. 173 ҳазору 220 сомонӣ ё 99 фоиз ва дар қисми хароҷот ба андозаи 15 млн. 552 ҳазору 410 сомонӣ  ё 94 фоиз таъмин карда шуд. Иҷрои нақшаи андозҳо  ва дигар пардохтҳои ҳатмӣ  пурра ва барзиёд иҷро  гардида, ба буҷа  аз ҳисоби андозу пардохтҳо  ба ҷои 7 545 ҳазору 769 сомонии  нақшавӣ 7 млн. 664 ҳазору 588 сомонӣ  ворид гардид, ки аз нақша 118 ҳазору 819 сомонӣ ва нисбат ба ҳамин давраи соли гузашта  495 ҳазору 004 сомонӣ зиёд буда, 102 фоизи нақшаи пешбинишударо ташкил менамояд. 
       Ҳамчунин нақшаи андози иҷтимоӣ дар маҷмӯъ бо назардошти хароҷот ба андозаи 87 фоиз иҷро гардид. Ба фонди ҳифзи иҷтимоӣ 5 млн. 007 ҳазору 891 сомонӣ маблағ ворид гардид, ки  нисбат ба нақша 728 ҳазору 324 сомонӣ кам  ва нисбат ба ҳамин давраи соли гузашта 495 ҳазору 004  сомонӣ  зиёд аст.
      Дар бахши сабти асноди ҳолати шаҳрвандӣ 1450 сабти таваллуд, 201 вафот, 417 никоҳ  ва 63 ҳолати  бекор кардани  ақди никоҳ  ва дигар ҳолатҳо  ба қайд гирифта шудааст.
       Ба саволи хабарнигори АМИТ «Ховар” дар мавриди он ки дар ноҳия сатҳи ҷинояткорӣ дар шаш моҳи соли равон зиёд ё кам шудааст,  раиси ноҳия  Раҷабзода Миралӣ  аз фаъолияти  масъулини шуъбаи корҳои дохилии ноҳия барои накушодани конуншиканиҳо  изҳори норозигӣ кард.
 Дар мавриди иштироки ҷавонони ноҳия дар ҷангҳои Сурия раиси шуъбаи ноҳиявии  Кумитаи давлатии амнияти  миллии Ҷумҳурии Тоҷикистон дар Файзобод Нуралӣ Муродов гуфт, ки аз ноҳия 4 нафар дар ҷангҳои Сурия иштирок дошта, як нафараш- Акмалҷон Ғиёсев,  сокини ҷамоати деҳоти  Қалъаи дашт   аз тарафи ҷангиён кушта шудааст.