Фархор: ҳаққи истифодаи об пардохт намешавад

Кӯлоб 02.07.2015. (АМИТ »Ховар», Сулаймони Хол).- Дар минтақаи Кӯлоб бо мусоид омадани обу ҳаво кишоварзон аҳлона меҳнат карда, анвои гуногуни маҳсулоти хоҷагии қишлоқро парвариш доранд. Хусусан дар ноҳияҳои Восею Фархор, ки солҳои қаблӣ деҳқонон ба оби ирригатсионӣ кам дастрасӣ доштанд, имсол дар ин масъала мушкилӣ надоранду дар парвариши сабзавоту полезӣ пешсафанд. Кормандони идораҳои беҳдошти замин ва обёрӣ дар навбати худ таҷҳизоти обрасонро аз таъмир бароварда, ба мавсим омодагии хуб дидаанд. 
Новобаста ба фаъолияти хуби кормандони соҳа истифодабарандагон ҳаққи истифодаи обро сари вақт пардохт намекунанд. 
Дар ноҳияи Фархор низ ҳамин аҳвол ба назар мерасад. Шумораи зиёди хоҷагиҳои деҳқонӣ, ки оби ирригатсиониро ба воситаи лӯлаҳо дастрас мекунанд, ҳаққи истифодаи обро пардохт накардаанд. Соли гузашта бо ҳамин сабаб идораи беҳдошти замин ва обёрӣ обкашҳои барқиро сари вақт таъмир карда натавонист ва як қисми хоҷагиҳо ҳосили маҳсулоти парваридаашонро  аз даст доданд.