Фавти 73 нафар дар ҳодисаҳои фавқулода

Хуҷанд, 20.07.2015. АМИТ «Ховар», Абдуаҳад Шарифзода).-Дар нимсолаи аввали соли ҷорӣ  дар қаламрави шимоли кишвар 313 ҳодисаи фавқулодаи дорои хусусияти гуногун ба қайд гирифта шуд, ки дар натиҷаи он  73 шаҳрванд ба ҳалокат расид.
Тавре ки муовини сардори ситод оид  ба ҳолатҳои фавқулода ва мудофиаи граждании вилояти Суғд Анвар Қосимов иттилоъ дод, ин нишондиҳанда нисбат ба нимсолаи аввали соли 2014 — 12 адад кам буда, маблағи умумии зарар 151 млн 229 ҳазор сомониро ташкил дод. 
Ба гуфти манбаъ, аз шумораи умумии ҳодисаҳои фавқулода  10 ададаш ҳодисаи фавқулодаи табиӣ буда, бар асари он 9 нафар ба ҳалокат расид, ки дар қиёс нисбат ба ҳамин давраи соли 2014 — 6 ҳодиса зиёд мебошад. 
Дар нимсолаи аввали соли ҷорӣ  дар кӯлу дарёву обанборҳои вилоят  25 ҳолати ғарқшавӣ ба қайд гирифта шудааст, ки бар асари он 16  шаҳрванд наҷот дода шуда, 9 нафар ғарқ шуд, ки ин рақам нисбат ба ҳамин давраи соли 2014 — 7 нафар кам мебошад.