“Хона ба хона” дар шаҳри Душанбе

Душанбе, 11.07.2015. (АМИТ «Ховар», Раъно Нусратуллозода).- Кумитаи кор бо занон ва оилаи назди Ҳукумати Ҷумҳурии Тоҷикистон гурӯҳҳои мақсаднокро аз ҳисоби занони фаъолу собиқадор, равоншиносон, ҳуқуқшиносон, табибон ва раисони маҳаллаҳои ҷамоатҳои шаҳраку деҳот таъсис дода, корҳои фардиро бо усули “Хона ба хона” ба роҳ мондааст. Ин амал бо мақсади омӯзиши сатҳи иҷтимоии оилаҳо, пешгирии омилҳои номатлуб ва дар сатҳи зарурӣ ташкил намудани чорабиниҳои Соли оила роҳандозӣ гардидааст.
Тавре ки аз   Кумитаи кор бо занон ва оилаи назди Ҳукумати Ҷумҳурии Тоҷикистон иттилоъ доданд,  корманди кумита Амина Мансурова дар маҳаллаҳои “Шафақ”, “Хоҷамбиёи поён”, “Хоҷамбиёи боло” ва кӯчаи Ҳабибулло Назарови ноҳияи Исмоили Сомонии шаҳри Душанбе ба оилаҳо рафта, бо тарзи зиндагии оилаҳои осебпазир ошно гардида, оид ба ҷараёни иҷрои қонунҳои Ҷумҳурии Тоҷикистон “Дар бораи танзими анъана ва ҷашну маросимҳо дар Ҷумҳурии Тоҷикистон”, “Дар бораи масъулияти падару модар дар таълиму тарбияи фарзанд”, “Дар бораи озодии виҷдон ва иттиҳодияҳои динӣ” ва “Дар бораи пешгирии зӯроварӣ дар оила ” ва дигар масъалаҳои мубрами рӯз суҳбату вохӯриҳо гузаронид.