Исфара: иқдоми нек дар самти ободонии ҳолати роҳҳо

Исфара, 14.07.2015. (АМИТ «Ховар», Тоҳирҷон Искандарзода).-Дар ҷамоатҳои деҳоти Навгилем ва Кӯлканди шаҳри Исфара навсозӣ ва таъмири куллии 1 километр роҳи самти Исфара-Ботканд оғоз шуд, ки он аз ҳисоби буҷети давлатӣ ва маҳаллӣ  амалӣ мегардад.
Татбиқи силсилаиқдомоти пешгирифтаи роҳбарияти шаҳр барои  беҳбуд бахшидани ҳолати роҳҳои мошингарди шаҳру деҳот, алалхусус таъмиру навсозии роҳҳои дохили маҳаллаҳо боиси ризоият ва қаноатмандии мардум гаштааст. 
Бояд тазаккур дод, ки анҷомбахшии навсозӣ ва таъмири куллии 1,2 км роҳи кӯчаи ба номи Бобоҷон Ғафуров, 800 метр роҳи байни 2 чорроҳа ва бурриши кӯчаҳои Бобоҷон Ғафуров ва Абдуллоеви маркази шаҳр, роҳи Гулистон-Кӯлканд ва чорроҳа ва буриши кӯчаҳои Абдуллоев- Бобоҷон Ғафуров тақвиятбахшандаи ташаббусҳои бунёдкорона дар самти ободонии роҳҳои Исфара гардиданд.
Бино ба иттилои сардори Муассисаи давлатии нигаҳдории роҳҳои мошингарди шаҳр Абдухаллоқ Абдусатторов то 12 июли соли 2015 наздик  ба 5 км роҳҳои шаҳру деҳоти Исфара навсозию таъмири куллӣ, 56 километр таъмири ҷорӣ ва 20 километр шағалпӯш гардид.