Кӯлоб: Баррасии сифати маҳсулоти хӯрокворӣ

  Кӯлоб, 25.07.2015. (АМИТ «Ховар», Сулаймони Хол).- Дар нишасти матбуотие, ки  бо иштироки намояндагони ВАО  ва масъулини Раёсати  стандартизатсия, метрология, сертификатсия ва  нозироти савдои минтақаи  Кӯлоб баргузор шуд, масъалаҳои  сифати маҳсулоти хӯрокворӣ, ченак, қонуншиканӣ дар самти фурӯши  маҳсулоти ниёзи мардум, ташхиси маҳсулоти нафтӣ  ва дигар масъалаҳои дахлдор баррасӣ шуданд.  Сардори раёсати мазкур Ҳикматулло Сафаров  гуфт, ки  дар шаш моҳи соли равон дар маҷмӯи  агросаноатӣ фаъолияти 144 корхонаву ташкилот ва соҳибкорон санҷида шуда,  бинобар   надоштани  сертификати мутобиқат  24 соҳибкор ҷарима шуда, ба онҳо сертификат дода шуд. Дар бахши  молҳои  ниёзи аввал 154 корхонаю ташкилот  ва соҳибкорон   санҷида шуда, 19 корхонаю ташкилот, 26 сехи дару тирезаи пластикӣ, 21 сехи  барориши хишти сементӣ, 2 сехи истеҳсоли мебел ва 82 нуқтаи савдо соҳиби сертификат шуд.