Кӯлоб: дар 4 иншооти тандурустӣ корҳои сохтмонӣ идома доранд

Кӯлоб, 11.07.2015(АМИТ «Ховар», Фарҳоди Мадамин).-Бо мақсади беҳтар намудани сатҳу сифати хизматрасонии тиббӣ, баланд бардоштани вазъи солимии аҳолӣ ва бо дорувору таҷҳизоти тиббӣ  таъмин намудани муассисаҳои тандурустӣ, иҷрои “Барномаи мубориза бар зидди бемориҳо”, хусусан бемориҳои сироятии сил  корҳои муайян ба сомон расида, пайваста тадбирҳои судманд амалӣ мегарданд. Дар айни замон дар ноҳияи Кӯлоб дар 4 иншооти тандурустӣ корҳои сохтмонӣ идома доранд.
Дар ин давра  168 ҳазор бемор аз тарафи марказҳои саломатии шаҳру деҳот қабул гардидааст, ки нисбат ба ҳамин давраи соли гузашта 18,9 ҳазор нафар зиёд мебошад. Дар шаш моҳи соли ҷорӣ 94 бемори сил, 34 бемори гирифтори ВНМО (СПИД)  ба қайд гирифта шудааст. Шумораи умумии гирифторони ВНМО ба 552 нафар расидааст. Яке аз роҳҳои паҳншавии бемории мазкур нашъамандӣ буда, шумораи нашъамандон 557 нафарро ташкил медиҳад.