Кумаки шаҳрдори Хуҷанд ба маъюби гурӯҳи 1

Хуҷанд, 07.07.2015. (АМИТ “Ховар”, Абдуаҳад Шарифзода).-Шаҳрдори Хуҷанд Раҷаббой Аҳмадзода дастур дод, ки ба муносибати Рӯзи шахсони имконияташон маҳдуд, ки ҳамасола дар кишвар 8 июл таҷлил мешавад, тамоми шахсони маъюб аёдат карда шуда, ба онҳо кумаки яквақтаи моддӣ иборат аз маводи ғизоӣ расонида шавад.
Тавре ки аз дастгоҳи роҳбари шаҳр иттилоъ доданд, дар ин замина дирӯз шаҳрдори Хуҷанд шахсан барои дастгирии шахсони ниёзманд, чанд оилаи дорои шахсони маъюбро аёдат кард. Зимни аёдат аз оилаи сокини маҳаллаи Тиллокони шаҳр Шодимаҳмад Одинаев ва ҳамсари ӯ Оимнисо Бобоева, ки ҳарду маъюби гурӯҳи 1, яъне нобино мебошанд, раиси шаҳр дар баробари расонидани кумаки ғизоӣ, ҳамчунин ба масъулин дастур дод, ки дар кӯтоҳтарин муддат хонаи мазкурро ки ба таъмири куллӣ ниёз дорад, аз таъмири хушсифат бароранд. Ҳамзамон бинобар тангии манзили зист оилаи Одинаевҳо, ки 8 нафар дар як хонаи дуҳуҷрагӣ иқомат доранд, то охири соли равон  бо супориши раиси шаҳр бо хонаи нави истиқоматӣ таъмин хоҳад шуд.