Маҳмадҷон Ҳабибуллоев-сармураббии “Равшан” аз вазифа рафт

Душанбе, 04.07.2015,(АМИТ «Ховар»  Меҳрони  Қурбон).-Дирӯз сармураббии дастаи “Равшан”-и Кӯлоб Маҳмадҷон Ҳабибуллоев аз вазифааш даст кашид. Дар ин бора худи ӯ ба Федератсияи футболи Тоҷикистон хабар додааст ва гуфта, ки ин тасмим баъд аз як вохӯрӣ бо президенти клуби “Равшан”-и   Кӯлоб Музаффар Исҳоқов гирифта шуд. Ба қавли ин мутахассиси 50-сола, ҳоло шартномаи фаъолияти ӯ бо ризоияти ду тараф пеш аз муҳлат қатъ карда шуд. Ёдовар  мешавем, ки Маҳмадҷон Ҳабибуллоев дар нимаи моҳи феврали соли ҷорӣ сармураббии дастаи “Равшан”-и шаҳри Кӯлоб  таъйин шуда буд.
Хотиррасон  менамоем, ки истеъфои Маҳмадҷон Ҳабибуллоев дар чемпионати имсолаи футболи мамлакат нахустин мебошад. Лозим  ба ёдоварист, ки зери роҳбарии ӯ дастаи “Равшан” дар қисми аввали чемпионат нӯҳ бозӣ гузаронид, ки дар чортои он ғолиб ва дар сетояш мағлуб шуда, ду вохӯриро мусовӣ анҷом дод. Бояд  зикр  кард, ки дастаи “Равшан”-и  шаҳри Кӯлоб баъди қисми якуми чемпионат бо 14 имтиёз дар зинаи панҷуми ҷадвали чемпионат қарор дорад.Бояд  гуфт, ки  дастаи “Равшан” нисбат ба дастаи “Хайр”-и  Ваҳдат, ки зинаи сеюми ҷадвали мусобиқаро ишғол мекунад, ҳамагӣ ду имтиёз камтар дорад.