Масъалаҳои ҳалталаби селексияи зироатҳои кишоварзӣ

Душанбе, 01.07.2015. (АМИТ «Ховар», Лайло Тоирӣ).-«Масъалаҳои ҳалталаби селексияи зироатҳои кишоварзӣ ва роҳҳои ҳалли онҳо»-таҳти чунин унвон имрӯз,  1 июл сессияи илмӣ баргузор гардид. Он бо  ташаббуси Академияи илмҳои кишоварзии Ҷумҳурии Тоҷикистон ва Академияи илмҳои Ҷумҳурии Тоҷикистон бахшида ба фаъолияти илмию ҷамъиятии  академики шинохтаи кишвар, селексионери машҳур Бобо Сангинов  доир шуд. 
Иштирокчиёни сессияи илмӣ  аз ҳаёт ва фаъолияти академик Бобо Сангинов ва саҳми  ў дар рушди илми тоҷик сухан карданд.
Академик Бобо Сангинов аз ҷумлаи олимонест, ки бо кашфиёти беназираш дар рушди соҳаи кишоварзии ҷумҳурӣ, бахусус пахтакорӣ ва зироатпарварӣ ҳамчун давомдиҳандаи мактаби илмии академик В.П.Красичков  муаррифӣ гардидааст. Ба қалами Бобо Сангинов зиёда аз 300 асари илмӣ тааллуқ дошта, ӯ муаллифи беш аз 20 кашфиёту ихтироъкорӣ мебошад.
Дар натиҷаи фаъолияти бисёрсолаи худ Бобо Сангинов навъҳои пахтаи серҳосили ба касалӣ тобовар ва дорои сифати баланди нах, ба монанди 5595-В, 6465-В, 6249-В, 8386-В, 8375-В ва ғайраро офаридааст. Инчунин ў ҳамчун селексионер навъҳои  пахтаи маҳиннахи 9326-В ва 8809-В бо нахи типи дуюм, ки ба бемориҳои вилти фузариозӣ ва пўсиши сиёҳи реша тобовар аст, навъҳои  юнучқаи В-233, В-300 ва В-416, ҷави В-116, В-128, соргои В-10, В-129, берсими Хатлон -3 ва дигар зироатҳоро ихтироъ намудааст.