Обхезии зараровар дар рӯдхонаи Ғунди Бадахшон

Душанбе, 17.07.2015. (АМИТ «Ховар»). — Бар асари боло рафтани оби рӯдхонаи Ғунд дар Вилояти Мухтори Куҳистони Бадахшон дар деҳаҳои Танг, Барсем ва Бердибекобод 15 хонаи истиқоматӣ хароб шуда, нерӯгоҳҳои “Помир-1” ва “Хоруғ” муваққатан аз кор боз дошта шудаанд.
Намояндагони Ҳукумати мамлакат, аз ҷумла раиси Кумитаи ҳолатҳои фавқулода ва мудофиаи гражданӣ Хайриддин Абдураҳимов ва масъулини ВМКБ дар ҷойи ҳодиса қарор доранд.
Бино ба иттилои масъулин, беш аз ду километр хатҳои интиқоли барқ корношоям шуда, қариб 5 километр роҳҳои мошингарди ҳудуди ноҳияи Шуғнон хароб гардидааст.
Аз рӯи баъзе маълумотҳо, дар поёни деҳаи Танг селоба сангу чӯб ва лойро дар як ҷо ҷамъ оварда, обанбори сунъӣ сохтааст, ки дар сурати канда шуданаш метавонад ба маҳаллаҳои поёноб хисорот ворид кунад.
Баҳри бартараф намудани оқибатҳои ин офати табиӣ комиссияи махсус таъсис дода шуда, корҳои бартарафсозӣ идома доранд.